Скопскиот градоначалник Петре Шилегов објави мерки за намалување на загадувањето на воздухот, меѓу кои е и бесплатен превоз со автобусите на ЈСП и на приватните превозници почнувајќи од денеска, како и прекин на градежните активности на градилиштата под надлежност на Град Скопје. Истовремено, ќе се ограничи обуката од автошколите, а ќе се врши и засилен надзор над капацитетите што загадуваат.
За престанокот на мерката за бесплатен јавен превоз, јавноста ќе биде дополнително информирана.
– Ги повикувам сите градоначалници од Скопскиот плански регион да помогнат во субвенционирањето на јавниот транспорт за полесно да ја поднесеме новонастанатата ситуација – рече градоначалникот Шилегов.
Тој ги повика сите градоначалници од општините на подрачјето на Скопје да ги прекинат градежните активности на градилиштата во нивна надлежност. Истовремено објасни дека инспекцискиот надзор во изминатите денови покажал дека ниту еден капацитет под надлежност на градот не испушта повеќе загадувачки материи од максимално дозволените концентрации.
– Градот Скопје ја интензивираше контролата и на градилиштата, односно возилата што излегуваат од градилиштата мора да имаат измиени тркала и да се покриени со церади. Комуналните инспектори на Град Скопје во изминатиов период направија 1.234 контроли и изрекоа 25 казни на компании заради непочитување на одредбите од Законот за јавна чистота. Го задолжувам и ЈП „Комунална хигиена“ да го продолжи интензивното чистење и миење на градските улици и булевари што се во надлежност на Град Скопје и им препорачувам на скопските општини да го направат истото на улиците што се во нивна надлежност – нагласи Шилегов.
Скопскиот градоначалник апелираше вработените во градската управа да доаѓаат на работа со автобусите од јавниот превоз, а службените возила ќе се користат исклучиво за Инспекторатот на Град Скопје.
Шилегов денеска даде препораки и до граѓаните.
– Апелирам до граѓаните да не ги користат возилата без потреба, повеќе лица да се возат во едно возило, да се користи јавниот превоз, за затоплување на домовите да не се користат отпадни материјали, прегорено машинско масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал, да се користи суво и чисто дрво без примеси од земја и од отпадоци, печките на дрво да се користат и одржуваат според упатствата на производителот – нагласи Шилегов.
