Топлото време што ќе ја зафати нашата земја од четврток до средината на следната недела ги алармираше државните власти околу можноста за појава на пожари. Дирекцијата за заштита и спасување (ДЗС) нагласува дека наредните денови ќе биде активирана жолтата фаза за високи температури, а во некои региони и портокаловата фаза.
Поради порастот на температурите на воздухот, ДЗС апелира да се внимава при престој на отворено и да не се фрлаат цигари, догорчиња, стаклен отпад и стаклени шишиња, да не се пали оган и скара на отворен простор и шума, да не се дозволува на децата да си играат со запалки, пламен и жар, да не се пали отпад и друг горлив материјал и да не се палат стрништа и меѓи. Ако се забележи пожар, веднаш да се извести противпожарната единица на телефонот 193.
Од ДЗС соопштуваат дека продолжува важноста на забраната за движење во шума и шумско земјиште освен за вработените во ЈП за национални шуми. Покрај основните препораки за однесување во вакви услови, согласно Законот за заштита и спасување, ДЗС презема и мерки и активности за превентивно делување за заштита од пожари. Во периодот до 15 август трае националната кампања за заштита од пожари, под мотото „Иднината им припаѓа на оние кои се подготвени – Природата е наша одговорност“.
