Обвинителството за организиран криминал и корупција соопшти дека по пожарот во модуларната болница во Тетово тие отвориле предмет по допрен глас за да ги проверат јавните набавки за изградба на 19 модуларни болници во државата.
„За таа цел, денеска до Бирото за јавни набавки и Министерството за труд и социјална политика е издадена Наредба за обезбедување на севкупната документација поврзана со изградбата на сите 19 модуларни болници“, соопштија од ова обвинителство.
Оттаму додаваат дека ќе ги анализираат прибраните материјални докази за да утврдат дали документацијата за јавните набавки соодветствува со техничката документација за овие објекти.
„Воедно, согласно своите надлежности Основното јавно обвинителство за гонење на организиран криминал и корупција ќе преземе и други дејствија за прибирање на докази со цел утврдување на фактичката состојба“, се вели во соопштението.
Претходно Министерството за здравство информираше дека стои на располагање на сите институции и може да ја приложи целокупната документација со која располага, за поставувањето на сите 17 ковид-центри во земјата.
Истражните органи водат уште една истрага за пожарот во ковид-центарот во Тетово, кој се случи ноќта веднаш по одбележувањето на три децении независност на државата и во кој загинаа 14 лица. Основното јавно обвинителство денеска соопшти повеќе детали за текот на втората истрага.