Основното јавно обвинителство во Белград по службена должност отворило предмет против М.К., мајка на седмоодделенецот кој на 3 мај годинава уби осум свои соученици и чуварот во училиштето „Владислав Рибникар“, а рани уште седум лица, од кои едно девојче подоцна почина. Обвинителството ќе утврдува дали во случајот кај мајката има елементи на кривично дело „запуштање и злоупотреба на малолетно лице“.
Обвинителството, како што пренесува Н1, испратило барање до српското Министерство за внатрешни работи за прибирање на потребните информации и наредило да се изврши распит со мајката и разговор со педагог, психолог и вработени во ОУ „Владислав Рибникар“. Исто така, на Градскиот центар за социјална работа му е наредено да изврши дијагностичка проценка во однос на функционалноста на семејството на 13-годишниот К.К.
Детето се наоѓа под надзор во психијатриска установа, додека неговиот татко, со чие оружје беа убиени 10 луѓе, е во притвор.
Децата од ОУ „Владислав Рибникар“ почнаа да одат во училиштето, а во српската јавност големи се дебатите за тоа, дали во објектот воопшто треба да се одржува настава во иднина.
