Основното јавно обвинителство Скопје отворило предмет по повод интервјуто на јутуберот Стефан Лазаров со Драган Павловиќ-Латас кое се емитуваше на 15 февруари.
Од обвинителството велат дека за настанот е доставено известување од Секторот за компјутерски криминал при МВР, а надлежен јавен обвинител ќе даде насоки за натамошни дејствија и проверки.
Ова интервју, каде што Павловиќ раскажува како, кога имал 15 години, тој и негов другар имале секусален однос со девојка која претходно била „шамарана“, предизвика жестоки реакции и осуди во јавноста кои не стивнуваат.
Од Хелсиншкиот комитет реагираа дека интервјуто e општествен пораз и реален приказ за тоа како се третираат жените жртви на насилство.
„Во видеото, кое веќе има над 50 илјади прегледи, за двајцата соговорници силувањето е извор на забава и смеа, со што тие директно праќаат порака кон огромната публика не само дека тоа е нешто нормално, туку и смешно. Ова интервју е само еден јавен и болен показател за тоа како во пракса изгледа нормализирање на културата на насилство и до каде може да доведе непостапувањето на институциите и немањето јасни ставови и политики кои ги заштитуваат жртвите, наместо насилниците“, стои во реакцијата на Хелсиншкиот комитет за човекови права.
На реакцијата се надоврзаа и други невладини организации и здруженија, меѓу кои и платформата „Медуза“ и здружението „Една може“.
На објавеното видео реагираше и директорка на коалиција Маргини, Ирена Цветковиќ, која искоментира дека додека Латас раскажува за случајот, јутјуберот Лазаров реагира со смеење.
„Додека Латас раскажува, Лазаров се кине од смеење, што особено го радува раскажувачот. Се смеат заедно, заоѓаат во злорадост, исполнети од сопствениот успех. Едниот мисли дека е мангуп зошто силувал, другиот мисли дека е мангуп зошто ја има можноста ексклузивно да го сподели овој подвиг на силувачот“, пишува во реакцијата на Цветковиќ.
По лавината реакции, во изјава што подоцна ја избриша, јутјуберот Лазаров негираше дека гостинот во емисијата зборувал за силување, додека на Инстаграм обвини дека во случајов станувало збор за „хајка“ против него.
