Јавното обвинителство денеска преку соопштение реагира на, како што велат оттаму, притисоците и нагласените повици за конечни одговори во врска со аферата „Прислушување“ и со случајот „Пуч“, како и повиците за лична и за колективна одговорност.

„Сметајќи дека со ваквите напади, се нарушува независното работење на јавните обвинители, како одговорни за гонење на сторителите на кривичните дела, ја информираме јавноста дека ниту Јавното обвинителство како институција, ниту кој било јавен обвинител нема да дозволат да бидат вклучени во интригите, ниту преку нив да се пресметуваат меѓусебно лицата инволвирани во случувањата, без разлика на причините и на мотивите поради кои тоа се прави“, стои во соопштението.

Од Jавното обинителство наведуваат дека истражната постапка по предметите бара преземање дејства, внимание, посветеност и време.

„Надлежните обвинители во основните јавни обвинителства кои работат на предметите не можат да излезат со став или изјава пред конечно утврдување на сите фактички и правни прашања поврзани со дадените настани“, велат од Јавното обвинителство.

За објавените снимки, за кои „се коментира дека, наводно, потекнуваат од примена на посебни истражни мерки, надлежните обвинителства издадоа наредби до надлежни органи за преземање мерки и дејства за да се извршат проверки и да се соберат известувања дали се работи за делови од истражни мерки или се други материјали, за тоа кој, кога и на кој начин ги објавил материјалите“, стои во соопштението и се додава дека: „До надлежните институции дадена е наредба да се отстранат снимките и да се спречат нивните натамошни објавувања. Исто така, се преземаат и активни дејства за материјалите што се однесуваат на наводно прислушувани разговори, а кои се објавуваат од страна на СДСМ“.

Според Jавното обвинителство, несериозно е надлежните обвинителства да даваат нецелосно проверени информации и, на тој начин, да ги поддржат шпекулациите и, како што велат оттаму, „да заземаат страна“.