Јавното обвинителство Кавадарци поднело обвинителен предлог против двајцата полициски инспектори, обвинети дека при постапувањето по претходни пријави, не му го одзеле оружјето на кавадарчанецот Т.С. кој на 9 ноември изврши тројно убиство.

Како што информираат од Обвинителството, поведувањето на постапката е по кривична пријава поднесена од Секторот за внатрешна контрола и професионални стандарди при МВР, за кривичните дела несовесно работење во службата и непостапување по законот за оружје.

– Обвинетите, како службени лица вработени во МВР, Надворешна канцеларија за криминалистички работи Кавадарци, подготвувајќи кривични пријави против лицето Т.С. од Кавадарци во одделни предмети, не постапиле по законот за оружје и не извршиле проверка дали осомниченото лице поседува дозвола за носење огнено поружје и дозвола за поседување огнено оружје. Иако кривичните дела со кои се товарело тогаш осомниченото лице укажувале на потешко нарушување на семејните односи, за кои имал и правосилна судска пресуда, сега обвинетите службени лица не презеле мерки за одземање на оружјето и не поднеле предлог за одземање на оружјето на осомничениот, стои во соопштението од јавното обвинителство.

Со истото оружје, осомничениот кавадарчанец на 9 ноември ги уби родителите и сестрата на својата поранешна сопруга.