Денеска бил обиен партиски штаб на СДСМ во Штип, од каде била однесена документација, потврди Владимир Милошев од општинската организација на СДСМ во Штип.

– Извршено е насилно влегување во партиските простории, направена е значајна материјална штета, претурена е целата партиска документација. Набргу ќе знаеме што недостига од документацијата – вели Милошев.

Од СДСМ не сакаат да посочат некого како можен сторител, единствено апелираат истражните органи да си ја завршат работата и да го откријат сторителот.

Ова е прв вандалски чин врз партиското седиште на СДСМ. Пред некоја година насилно беше влезено во седишето на ВМРО-ДПМНЕ и беше однесена партиска документација со списоци на членови.

Јавноста не беше известена дали се откриени сторителите.