Јасна порака дека Грција мора да продолжи со реформите, а меѓународните кредитори да овозможат намалување на грчкиот долг за Грција да се движи кон економски развој, испрати американскиот претседател Барак Обама од Атина.

Според информациите од владиниот кабинет, Ципрас и Обама не разговарале за спорот меѓу Македонија и Грција. Грчкиот долг и економијата биле главна тема на која се фокусирале Обама и грчкиот премиер Алекис Ципрас.

– Зa реформите да бидат одржливи, на грчката економија ѝ треба простор да се врати во развој и да почне повторно да создава нови работни места. Не можеме да гледаме на штедењето како стратегија и важно е грчките луѓе повторно да почнат да гледаат подобрување во секојдневниот живот. Како што Грција продолжува со реформите, ММФ има посочено дека олеснувањето на долгот е клучно и јас ќе продолжам да апелирам до кредиторите да ги направат потребните чекори за да ја вратат Грција на патот кон економското заздравување бидејќи е во наш интерес Грција да успее – истакна Обама.

Обама посочи дека сочувствува со грчкиот народ за тешкиот и болен период на реформи и мерки за штедење, но посочи дека овие реформи се неопходни за државата повторно да има напредок и да стане атрактивна за инвеститорите. Грчкиот премиер изрази благодарност за американската поддршка во тешките моменти кога останувањето на Грција во еврозоната беше под знак прашалник и истакна дека државата веќе не може да поднесе нови мерки за штедење.

Тема на разговор била и бегалската криза, за која Обама ги поздрави грчките напори и начинот на кој човечно им помогнале на бегалците. Обајцата лидери истакнаа дека е од голема важност да се одржи договорот меѓу ЕУ и Турција за бегалците, со кој се контролира бегалскиот бран. Говорејќи за бегалската криза, Ципрас упати критика кон европските и балканските држави за затворање на балканската рута за бегалците и за мигрантите.

– Ние сме држава која и покрај унилатералното затворање на балканската рута и притисоците врз нас за прекршување на заедничките вредности, сè уште инсистира дека единствениот пат за справување со бегалската криза е почит на меѓународното право, соработка со транзитните држави и државите на потекло и справување со корените на миграцијата – посочи Ципрас.

На состанокот се разговарало и за енергетиката и за новите гасоводи кои ќе поминуваат низ Грција, ТАП и ИГБ, можностите за зајакнување на билатералната соработка, кипарското прашање, соработката во НАТО и за нови американски инвестиции во Грција.

Обама и Ципрас се фокусирале и на безбедноста во регионот и на неопходноста од соработка во борбата со тероризмот.