Американскиот претседател Барак Обама на денешната средба со конгресните лидери во Белата куќа треба да разговара за своето барање Конгресот да одобри армиска сила и дополнителни милијарди долари за борба против Исламската држава (ИД).

На прес-конференција неделава, Обама најави дека ќе побара од законодавците да изгласаат употреба на армиска сила против ултрарадикалната милитантна група во Ирак и Сирија. По конгресните избори одржани во вторникот, претседателот сега се соочува со опозиција во обата дома на Конгресот – републиканците ја презедоа контролата во Сенатот, а го задржаа мнозинството во претставничкиот дом.