Српската премиерка Ана Брнабиќ денеска најави дека ќе се укине уредбата за централизирано информирање во врска со корона вирусот, откако вчеравечер една новинарка беше уапсена „поради ширење паника и предизвикување немири“.
Брнабиќ нагласи дека тоа ќе се случи по молба на претседателот на Србија, Александар Вучиќ, а дека одлуката за уредбата била нејзина и била глупава.
– Тоа е моја глупост и моја одговорност, моја е глупоста што не образложив кога ја донесовме – рече српската премиерка.
Таа порача оти верува дека уредбата ги штитела граѓаните од непроверени информации, но Вучиќ не сакал да се фрла сенка на целосно информирање.
Уредбата, односно Заклучок на владата, кој стапи на сила завчера, предвидуваше дека за известување на јавноста за состојбата и последиците со заразата каде било, е задолжен исклучиво Кризниот штаб на чие чело е премиерката, а известувањето за превземените мерки од неовластени лица не може да се сметаат точни и проверени, со можност за тоа да има правни последици за ширење дезинформации во период на вонредна состојба.
Ана Лалиќ, новинарка на порталот Nova.rs, беше пуштена од притвор утрово, откако вчеравечер беше уапсена бидејќи Клиничкиот центар на Војводина го известило обвинителството и полицијата дека со својот текст ја вознемирила јавноста и наштетила на угледот на таа здравствена установа. Претходно КЦ Војводина изрази „огорченост поради неточно, непроверено и злонамерно известување на порталот Nova.rs за работата на оваа здравствена институција и обвини за „вознемирување на јавноста и нарушување на угледот“.
Новинарката во текстот под наслов „КЦ Војводина преку пукање: Без заштита за медицинските сестри“ пишувала дека во Клиничкиот центар владее хаос и има хроничен недостиг на основна опрема – лична заштитна опрема, санитетски материјал и лекови.
По приведувањето на Ана Лалиќ и беше изречен притвор од 48 часа, но сепак одлуката беше преиначена.
Поради приведувањето реагираше „Фридом Хаус“, порачувајќи дека иако е пандемија, на новинарите треба да им се овозможи да ја работат својата работа без страв дека ќе бидат уапсени и да ја информираат јавноста за кризата во јавното здравство.
Реагираа и голем број партии, граѓански организации и медиуми во Србија, а револт поради апсењето се изразуваше масовно и на социјалните мрежи.
