Во регионот и низ Европа повторно кружат дезинформации дека украинскиот претседател Володомир Зеленски наводно се луксузирал. Овој пат тој „откупил“ издашна вила со винарија и лозја што припаѓа на англискиот музичар Стинг. Колегите од грузискиот Mythdetector проверија со италијанскиот регистар за недвижнини од каде потврдија дека до 8 август 2024 имотот сè уште припаѓал на Стинг. Ова е само една дезинформација од купишта со кои се поткопува угледот на Зеленски и семејството. Дезинформацијата се шири откако Г7 економиите одобрија 50 милијарди за Украина и во време на прогресот на украинските сили во областа на Курск, пишува Вистиномер.
Текстот го пренесуваме во целост:
Украинскиот претседател Володомир Зеленски повторно е мета на дезинформации, овојпат поради наводно луксузирање со имотот „Tenuta il Palagio“ во Тоскана, вреден 75 милиони евра. Се тврди дека имотот што вклучува раскошна вила со винарија и лозја, го откупил од познатиот англиски музичар Стинг. Оваа дезинформација ја проверија повеќе колеги од Италија, Украина, Естонија, Чешка, Словачка, Србија и Грузија.
Најнапред треба да се потенцира дека ова е измислица. Дезинформацијата започнува да се шири од сајтот Databаse Italia, од каде што иако во моментот тие го имаат отстрането написот, на прелистувачот Гугл сè уште може да се најдат траги.
Потоа овој напис мигрира на руските (дез)информациски екосистем 1ТВ.ру, Спутник, Лента, од каде што преку српските РТ, Информер, Правда, Борба се проширува и низ наште простори. Кај нас напис на оваа тема може да се најде во Вечер (vecer.press). На социјалните медиуми најдовме само една објава која нема привлечено особено внимание или интерес кај македонската публика.
Во секој случај, клучниот доказ на којшто сите портали се потпираат се документи од наводната трансакција каде се пишува дека Стинг и неговата сопруга го купиле винскиот имот во 1997 година и го продале на 28 јуни оваа година. А, според „договорот“, купецот е компанијата на Зеленски, „San Tommaso SRL“.
Грузиската организација за проверка на факти MythDetector објави дека побарaле од италијанскиот регистар за недвижности Agenzia delle Entrate да има дадат информации за овој имот. Според документот што го добиле, во системот последно ажуриран на 08 август 2024 година, сопственик на имотот Tenuta il Palagio сè уште е Самнер Гордон Метју, односно пејачот Стинг.
Преземено од Mythdetector.ge
Во прилог на тоа, може да се види дека од официјалната страна на Стинг на Инстаграм и Фејсбук има објави со слики од овој имот, споделени на 7 и 9 август:
Знаеме кога Стинг се враќа во неговото тосканско светилиште бидејќи воздухот е исполнет со песна и мелодии… пишува во објавата.
Серија на измислици за наводните луксузирања на Зеленски
Откако започна руската „специјалната воена операција“ во Украина, Володомир Зеленски, како и членовите од неговото семејство, беа и сè уште се една од главните мети на дезинформации, не само кај нас туку и низ низ целиот свет. Целта е да се прикаже наводната корумпираност на украинскиот претседател и со тоа да се намали финансиската помош што ја добива Украина. На оваа тема Вистиномер има пишувано повеќепати само оваа година:
-
- Не е вистина дека сопругата на Зеленски купила автомобил „бугати“ од 4,5 милиони евра
- Нема докази дека Зеленски купил вила од британскиот крал Чарлс Трети за 20 милиони долари
- Со дезинформации се урива финансиската помош за Украина
- Зеленски нема купено две јахти вредни 75 милиони долари
- Зеленски не купил казино во Кипар
Битно е да се спомене зошто токму сега се шират овие дезинформации – два момента се клучни. Прво, за време на Г7 самитот во Италија, Украина доби огромна финансиска поддршка од западните економии, кои ќе мобилизираат дополнителни 50 милијарди долари со користење на замрзнати руски државни средства во странство. Второ, како што пишуваат од Политико, офанзивата на украинските сили во Курск во Русија го засрами Путин и покажа дека заради летаргичниот одговор на руската команда 92 населени места се под украинска контрола. Со цел да се оттргне фокусот од Курск, се наоѓаат секакви вектори на дезинформациски напади, па дури и такви што лесно може да се проверат и демантираат.
Пишува: Матеј Тројачанец
