Претседателот Стево Пендаровски, денеска ги прими акредитивните писма на новоименуваната амбасадорка на Соединетите Американски Држави во земјава, Кејт Мари Брнз, со што таа и официјално стапи на должност.
Во своето обраќање, претседателот Пендаровски, посакувајќи ѝ на новата амбасадорка успешно вршење на функцијата, порача дека нејзиното именување, како добар познавач на регионот и на земјава, е „уште една потврда на одличните политички односи и плодната соработка меѓу двете пријателски држави“.
– Одбележувањето на 25-годишнината од воспоставувањето на дипломатските односи следната година треба да даде дополнителен импулс за натамошно негување и зајакнување на стратегиското партнерство и политичкиот дијалог меѓу нашите пријателски земји, како и за продлабочување на соработката во сите останати области. Дозволете, во оваа прилика, да изразам голема благодарност за континуираната и цврста поддршка што Соединетите Американски Држави и ја дават на нашата држава од самиот почетокот на нејзината независност. Таа поддршка, посебно изразена во доменот на остварувањето на стратешките цели – целосно интегрирање во Евроатлантските структури и организации – не е само доказ за цврстото пријателство, туку и суштествен поттик и охрабрување за успешно соочување со сите предизвици во денешниот свет на постојани промени – рече Пендаровски, изразувајќи увереност дека и во иднина ќе продолжи безрезервната поддршка од САД за земјава.
Новата амбасадорка на САД, пак порача дека ѝ е задоволство што стапува на должност во значаен период на двете земји, кога се очекува Македонија да стане полноправна членка на НАТО.
– Ми претставува особено задоволство да го започнам мојот мандат во овој клучен период за односите помеѓу нашите две земји. Со нетрпение очекуваме, до крајот на годината, да ѝ посакаме добредојде на Северна Македонија како 30-та членка на НАТО алијансата. Како сојузници, нашите односи ќе стануваат посилни, поврзани преку нашата заедничка заложба за мир, безбедност и просперитет во регионот и пошироко.
Во очекување на овие случувања, ние продолжуваме да работиме врз основа на веќе изградените цврсти темели и на традицијата на партнерство. Повеќе од 25 години работиме заедно и постигнавме многу во унапредувањето на нашите заеднички цели – да ја видиме Северна Македонија целосно интегрирана во западните институции и целосно посветена на нашите заеднички вредности – демократија, индивидуална слобода, и владеење на правото. Нашите две земји се посилни поради нашата соработка – рече Кејт Мари Брнз.
Таа напомена и дека со задоволство очекува да научи повеќе за земјава.
-Лично, се радувам што ќе ја искусам убавината и различностите на Северна Македонија и што ќе научам повеќе за вашата динамична култура, за традициите и за историјата на вашата земја. Ќе барам можности за споделување на културата на Соединетите Држави и за градење на мостови помеѓу граѓаните на двете земји – рече американската амбасадорка на церемонијата.