Нова едиција „Басни од Македонија“ издадоа Движењето за поддршка на креативноста „Браво сине“ и издавачката куќа „Арс ламина“.

Едицијата е составена од басните „Кучето и зајакот­“, „Лакомата мечка“, „Војската на лавот“ и „Жабата и глушецот“, кои произлегуваат од усното народно творештво, а се собрани од Марко Цепенков.

Креативните илустрации за басните ги изработи Катерина Николовска, која работеше и на илустрациите за едицијата „Бајки од Македонија“, а нејзините илустрации беа избрани на јавен конкурс.

– „Бајки од Македонија“ беше одлично прифатен проект и покажа дека читателската публика, а особено најмладите, сакаат квалитетно четиво, што истовремено е и модерно и ги поврзува со културолошкиот код што го носиме сите ние како наследство од претходните генерации. Токму затоа решивме годинава да продолжиме во истата насока и годинешниов проект да  го посветиме на најмладата публика, која е и најстрог критичар – изјави Ангелка Пеева-Лауренчиќ, член на управниот одбор на движењето.