Земјотрес со јачина од 6,3 степени според Рихтеровата скала ја погоди јужна Турција во близина на сириската граница доцна попладнево, предизвикувајќи паника и дополнителна штета две недели по најсилниот земјотрес во модерната историја во земјата, со повеќе десетици илјади жртви, објави Ројтерс.
Според сведочењата на новинарите потресите биле силни и долготрајни, оштетувајќи згради и оставајќи прашина во ноќниот воздух во центарот на градот Антакија, каде што бил епицентарот. Земјотресот бил почувствуван и во Египет и Либан, објави Ројтерс.
Европскиот медитерански сеизмолошки центар (EMSC) соопшти дека потресот се случил на длабочина од 2 километри.
Полицијата патролирала во Антакија додека амбулантни возила се упатиле кон областа погодена од земјотресот во близина на центарот на градот. Две лица се онесвестиле, а други излегле на улиците околу централниот парк.
Новинарите на Ројтерс забележале турски спасувачки тимови како трчаат пеш по последниот земјотрес за да ги проверат жителите, од кои повеќето живеат во привремени шатори по потресите од пред две недели.
Муна Ал Омар, за Ројтерс изјави дека била во шаторот во паркот во централна Антакија кога се случил земјотресот.
„Мислев дека земјата ќе се расцепи под моите нозе“, рече таа, плачејќи додека го држеше својот 7-годишен син во рацете.
„Дали ќе има уште еден потрес?“, праша таа.
Двата поголеми земјотреси што се случија на 6 февруари, кои ја потресоа и соседна Сирија, оставија повеќе од еден милион луѓе без покрив над главата, а загинаа над 46.000 лица во двете земји.
_01.jpg){kind=link}