Норвешкиот хелсиншки комитет (НХЦ), норвешката ЛГБТ-организација (ЛЛХ) и „Амнести интенејшнел – Норвешка“, испратија писмо до премиерот Никола Груевски, министерката за внатрешни работи, Гордана Јанкулоска, како и Јавниот обвинител, Марко Зврлевски, во кое ја изразија својата загриженост за состојбата со ЛГБТ-лицата во Македонија, објави „Нова ТВ“.
„Две лица добија повреди по телото и на главата по нападот врз кафе-барот ,,Дамар‘‘ во Старата скопска чаршија на 23 октомври 2014 за време на прославата по повод двегодишнината од отворањето на ЛГБТ-центарот за поддршка. Ова е шести напад врз ЛГБТ-центарот за поддршка од неговото основање пред две години. Претходните напади вклучувале навреди, тепања, каменувања и опожарувања. Досега, соодветна истрага е спроведена само во еден од овие случаи, со што на хомофобичните и на трансфобичните сили им се остава впечаток дека кривичните дела поттикнати од омраза кон ЛГБТ-лицата може да поминат неказнето.
НХЦ, ЛЛХ и „амнести интернејшнел – Норвешка“ ја повикуваат Владата на РМ, МВР, Јавното обвинителство и надлежните судови јавно да ги осудат сите акти на насилство, да спроведат соодветна истрага на кривичните дела поттикнати од омраза и соодветно гонење на сторителите“, се вели во писмото испратено до македонските институции.
