Националната мрежа против хомофобија и трансфобија (НМХТ) остро го осудува физичкиот напад врз претседателот на „ЛГБТИ Јунајтед“ – Тетово, Беким Асани кој се случил во Струмица во понеделникот на 8 август.
Како што се наведува во реакцијата, според сведоштвото на Асани и неколку други сведоци, нападот се случил во центарот на Струмица, каде тој бил со волонтер(к)и од „ЛГБТИ Јунајтед“ на јавен настан за промоција на нивната организација. Според неговото кажување, Асани бил нападнат од возрасно машко лице кое прво му упатило закани и навредливи зборови, а потоа го нападнал, по што му се нанесени телесни повреди.
„Според информациите изнесени од Асани на Фејсбук, постојат докази за докажување на идентитетот на сторителот на делото. Дополнително, известува дека полицијата не дошла итно по нападот, иако за настанот биле известени навреме и од нив било побарано обезбедување – кое не го добиле. Дополнително, Асани информира дека во самата полициска станица каде што подоцна се упатил, бил мета на дискриминација и навреда од страна на вработените“, се вели во написот на активистите.
Во реакцијата стои дека Хелсиншкиот комитет за човекови права како членка на Националната мрежа против хомофобија и трансфобија, има испратено барање до СВР Струмица и се очекува проверка и санкции врз сторителот на делото, како и во институцијата интерно за третманот врз жртвата од страна на полицијата.
„Имајќи предвид дека кривичните дела од омраза кон припадници на ЛГБТИ заедницата ретко добиваат правен епилог, инсистираме на итно и темелно постапување од страна на органите на прогон и целосно расчистување на овој случај. Треба да се има предвид дека игнорирањето на говорот и делата од омраза кон ЛГБТИ лицата и неказнивоста на сторителите на овие дела води до продлабочување на недовербата во институциите, поради што многу вакви напади воопшто не се ни пријавуваат. Апелираме институциите еднакво да ги третираат сите граѓани во државата и да престанат да придонесуваат кон јакнење на дискриминацијата и насилството на кое се подложени сексуалните и родовите малцинства“, реагираат организациите за човекови права.
