Во интервју за телевизија со национална концесија вицепремиерот и министер за транспорт Александар Николоски даде изјава околу погрешно пренесена информација која може да се оцени како недоследна:
„Не знам на кој начин таа информација е пласирана во јавноста, но мислам дека појасно треба да ги прикажеме работите. Ние работиме на еден голем инвестициски циклус кој што би требало да опфаќа повеќе сектори, тука е секако и ресорот кој што јас го водам…се работи за тековни и нови проекти и се работи за проекти што ќе ја променат сликата во Македонија. Но тоа не значи дека од едно место ќе се позајмат определeна сума на пари, туку тоа значи дека дел од тие средства се обезбедени во рамки на буџетот, а дел секако ќе бидат позајмени…Делот дека толку ќе се задолжи државата е погрешно пренесен, а дали има државата амбиција толку да реализира, тоа е веќе потврден одговор.“
[Извор: Сител/Тема на Денот – Николоски/ интервју/(од 0.20 до 1.28 мин.); Датум – 07.05.2025]
Образложение:
Вицепремиерот и министер за транспорт Александар Николоски недоследно изјавува дека не знае од каде е пласирана информацијата за задолжување на државата за 5-6 милијарди евра за нови инвестиции, бидејќи тие податоци беа пласирани во јавноста преку два извора коишто се од неговата матична партија ВМРО-ДПМНЕ.
Првиот извор е пратеникот од ВМРО-ДПМНЕ Бојан Стојаноски во прилог на ТВ Сител, емитуван ден претходно (06.05.). Прилогот е пласиран под наслов Владата најавува инвестициски циклус од 6 милијарди евра, а во него се наведува:
„Владата ќе се задолжи помеѓу 5,5 до 6 милијарди евра. За две до три недели ќе се склучи меѓувладин договор со моќна европска држава, со чии пари ќе се градат инфаструктурни проекти. Парите не би се повлекле наеднаш, туку во неколку транши, а за првиот циклус – за локални, регионални и експресни патишта – од половина до една милијарда евра. Пратеникот од ВМРО ДПМНЕ, Стојаноски, не откри детали од која држава ќе се земе кредитот, но вели дека е со многу поволни услови. Според него, ова задолжување нема да го зголеми јавниот долг.“
Иако директно нема говор на Стојановски во таа насока дека од една држава ќе се земат тие пари, текстот на искусната новинарка за финансии и економија што разговарала со него, речиси и да не остава простор дека нешто е погрешно разбрано. Уште повеќе што Стојановски за задолжувањето е пренесен и од други два онлајн медиума со истиот датум од 06.05.2025 г., а од негово гостување ден претходно на ТВ 24 (види тука и тука).
Потоа, на 07.05.2025 година, матичната партија на Николоски ВМРО-ДПМНЕ комуницира со јавноста со соопштение каде што се бројат безбројни проекти што планира да ги реализира Владата во наредниот период, со истата сума. Соопштението е со наслов:
„Нов бран на странски инвестиции кои ќе донесат од 5 до 6 милијарди евра во Македонија, што значи нови работни места за граѓаните и модернизација на државата.“
Сето ова може да се види и од агрегаторот на вести Тајм.мк за датумите од 06.05 до 08.05. Насловите упатуваат на заклучокот дека Владата со пари од странство (задолжувања и инвестиции) планира да реализира голем инвестициски бран во повеќе области.
Така што, можеби е вистина дека Владата нема намера од едно место да се задолжи за 5-6 милијарди евра, но секако е недоследно кон јавноста да се тврди дека погрешно била пренесена информацијата и не знае како се стигнало до таа информација од страна на Николоски. Според тоа со какви наслови и содржина се движеле информациите објавени во медиумите, очигледно е дека изворите на погрешно разбраните или недоразбраните информации, сепак се во неговата матична партија ВМРО-ДПМНЕ.
Извори:
- (07.05.2025) Сител – Николоски/интервју – [Проверено на 08.05.2025]
- (06.05.2025) Сител – Прилог/Задолжување/Стојаноски – [Проверено на 08.05.2025]
- (06.05.2025) 360 Степени – Стојаноски: За две недели… – [Проверено на 08.05.2025]
- (06.05.2025) Плусинфо – Ќе се гради на…Владата ќе склучи… – [Проверено на 08.05.2025]
- (06-08.2025) Тајм.мк – агрегирани вести – [Проверено на 08.05.2025]
Оценил: Теофил Блажевски
