До денеска не се стасани никакви предлози или реакции до Министерството за труд и социјална политика за предлог-нацртот на стратегијата за интеграција на бегалци и на странци 2017- 2027 година и за предлог-нацртот на националниот акциски план за интеграција на бегалци 2017- 2027 година, велат за „Мета“ од одделот за односи со јавноста на Министерство.
Иако по социјалните мрежи во изминативе десетина дена се реагираше за планот на министерството за нов пристап кон бегалците и барателите на азил, а прес-конференција одржа и Влатко Ѓорчев од ВМРО-ДПМНЕ, критикувајќи го планот, ниту партијата, ниту поединци, ниту организации немаат испратено свои забелешки до подготвувачот на предлогот – Министерството.
Рокот за испраќање предлози е 8 август, а тоа може да се направи преку пополнување посебен формулар објавен на веб-страницата на министерството.
На социјалните мрежи овие два нацрт-документи беа дочекани на нож, при што се зборуваше дека новата влада сака „да ја наполни Македонија со азиланти“. Влатко Ѓорчев од ВМРО-ДПМНЕ, пак, на 22 јули обвини дека стратегијата овозможува олеснето доделување државјанства, сместување и изградба на цели станови, населби, згради, како и олеснет пристап до градинки, училишта за сметка на граѓаните на Република Македонија, но и вработување на бегалци и на азиланти во време кога вработувањата и тоа како им се потребни на граѓаните на Република Македонија.
Тој ја критикуваше и замислата да не се бараат документи од матичните земји на овие лица, односно рече дека тоа отвора простор за лажно претставување и опасност за Македонија.
