Нема да растат платите на именуваните и избраните лица, судиите, членовите на судскиот совет, јавните обвинители и членовите на советот на јавните обвинители и истите, преку интервенција во коефициентите за пресметка на платите, се замрзнуваат.
Вака одлучи Владата на денешната 38-ма седница на која беа донесени и низа други одлуки.
Од таму велат дека овој чекор се прави со цел да се заштити јавниот интерес и да нема дополнителни фискални импликации врз Буџетот.
„Имајќи ја предвид тенденцијата на пораст на просечната плата за 2024 година во однос на просечната плата за 2023 година, Владата донесе одлука за изменување и дополнување на законите во кои се утврдени коефициентите за пресметка на платите на избраните и именувани лица, судите, членовите на судски совет, јавните обвинители и на членовите на совет на јавни обвинители и за таа цел ги задолжи Министерство за економија и труд и Министерство за правда, секој во своја надлежност да достават изменување и дополнување на законите, на тој начин што ќе се изврши намалување на утврдените коефициенти за пресметка на платите, сè со цел да не се направи дополнителна штета“, се вели во владиното соопштение.
Актуелните законски решенија предвидуваа пораст на платите на избрани и именувани лица.
Од Владата додаваат дека со ова замрзнување, од година во година се намалува процентот на пораст на платите на избраните и именуваните лица, сè со цел да се дојде до „процент еднаков на нула“.
Инаку, на денешната владина седница е донесена и одлука со која се обезбедени околу една милјардна денари за исплата на К-15, што е законска обврска за сите работодавци.
Донесена е и одлука со која им се препорачува на сите органи на државната управа, со цел да не се предизвикаат дополнителни финансиски импликации врз Буџетот, да не се врши исплата на тринаесетта плата за 2024 година.
