Како што за Ројтерс потврдуваат независни експерти, со доведувањето во корелација меѓу целосниот број дози вакцини администрирани во Европа и стапките на смртност за само еден месец, се пропушта да се детектираат и другите потенцијални причини за смртноста и не се даваат никакви докази дека прекумерната смртност настанала токму поради вакцините против ковид-19, пишува „Вистиномер“ во својата анализа.
Текстот подолу го пренесуваме во целост:
Рецензираме пост објавен на социјалната мрежа Фејсбук, во кој се споделуваат податоци од Еуростат, кои се погрешно интерпретирани, а се споделува и текст во кој се тврди дека прекумерната смртност во некои европски земји, претставува последица на вакцинацијата против ковид-19. Веќе подолго време, односно од почетокот на вакциналната кампања, наративот дека вакцините се убиствени и штетни по здравјето се пласира врз основа на погрешно или нестатистичко толкување на бази на податоци кои се испревртуваат и така погрешно се презентираат на јавноста.
Во постот што го рецензираме се вели дека „после масовното вакцинирање, Фејсбук се претворил во некролог, а дека новите бројки за вишок смртност продолжуваат да растат”.
Во моментов на социјалните мрежи кружи компилација која зборува за прекумерна смртност во европските земји во јули 2022 година – споредено со годишниот просек од 2016-2019 година. Треба да се стравува дека врските ќе бидат јасни на маса штом веќе не се спречуваат научните истражувања кои го поврзуваат текот на кампањите за вакцинација со текот на прекумерната смртност. Многу гласови моментално нечуени или поттиснати од мејнстримот долго време предупредуваат на фаталните несакани ефекти од големиот експеримент за вакцинација. Ако има други причини за прекумерната смртност од 2021 година, тие во секој случај би требало да бидат подобро оправдани отколку од идеолошкото чувство дека земјата дополнително ќе се загрее поради човечкото влијание. Бидејќи нашата планета ниту се загрева особено забележливо ниту брзо, вишокот на смртност нема никаква врска со климатските зони на кој било мерлив начин. Па, мора да има некоја друга причина, се вели во постот.
Прекумерната смртност не е резултат на вакцинацијата против ковид-19
Како што за Ројтерс потврдуваат независни експерти, со доведувањето во корелација меѓу целосниот број дози вакцини администрирани во Европа и стапките на смртност за само еден месец, се пропушта да се детектираат и другите потенцијални причини за смртноста и не се даваат никакви докази дека прекумерната смртност настанала токму поради вакцините против ковид-19.
Професорот Џефри Морис, кој е директор на одделот за биостатистика на Универзитетот Пенсилванија, за проверувачите на факти на Ројтерс вели дека ако вакцините предизвикувале прекумерни смртни случаи, тогаш тоа конзистентно би се гледало во земјите со високи стапки на вакцинација, а не само во неколку.
