Отсекот за компјутерски криминал при СВР Охрид денеска, од повеќе профили на неколку социјални мрежи, евидентирал зачестени објави во кои, од граѓаните се бара со „клик“ на линкот, да ја отворат и прочитаат објавата или да учествуваат во ексклузивни „наградни игри“ или да инвестираат во виртуелни валути.
„Од преземените мерки, констатирано е дека се работи за лажно креирани профили и поради сомненија за сторени кривични дела од областа на интернет измамите, до граѓаните но и до правните субјекти, апелираме на крајна внимателност при комуникациите на социјалните мрежи. За да не бидат злоупотребени, граѓаните да не наседнуваат на ваквите лажни објави, да не ги отвораат истите, да не ги следат и да не остават свои лични и други податоци или службени информации“, апелира СВР Охрид.
Поради комплексниот начин на истрага, велат оттаму, една од ефикасните форми за борба против овој вид на криминал е превенцијата и градење висока свест и совест при комуникацијата и користење на интернет мрежите.
„Потсетуваме дека информациите за постоење на сомненија за овој вид измами, навремено да се пријават до СВР Охрид“, додаваат оттаму.
