Синдикалната организација на Гимназијата „Орце Николов“ од Скопје, со отворено писмо ја извести јавноста дека 42 наставници од гимназијата ќе го продолжат штрајкот на СОНК.

„Овој штрајк е наш апел за подигнување на свеста на наставниците дека имаат лична и морална одговорност да изразат солидарност и почитување на работничките права. Наставниците – штрајкувачи целосно застануваат зад барањата на СОНК, во кои јасно стојат и ставовите за целосно редефинирање на проектот екстерно тестирање“, се вели во писмото.

Наставниците велат дека настапуваат само во одбрана на вистинскиот квалитет и на вистинските вредности и во одбрана на знаењето на учениците, кое се обезвреднува со, според нив, „екстерен квиз“, составен од честопати неважни факти, кои не се квалификатив за знаење.

„Сметаме дека премолчувањето на вистината за проблемите во македонското образование, особено од самите наставници, е недозволив чин на помирување со негативните последици од екстерното тестирање, со административните обврски и со уште многу други проблеми. Токму сега наставниците треба да бидат единствени и да покажат општествена и морална одговорност како интелектуалци“, се вели во отвореното писмо на наставниците.