Европската централна банка (ЕЦБ) и Народната банка на Северна Македонија (НБРСМ) склучија договор за соработка во сферата на заштитата на банкнотите во евра од фалсификување. Со тоа, како што соопштија од НБРСМ, се остварува уште еден чекор во исполнувањето на препораките од најновиот извештај на ЕК за следење на мерките на Европскиот систем на централни банки.

Договорот го потпишаа гувернерката на НБРСМ Анита Ангеловска-Бежоска и претседателката на ЕЦБ, Кристин Лагард. Според него се предвидува, ЕЦБ на барање на НБРСМ, да обезбедува технички информации за оригиналните банкноти во евра, како и информации поврзани со фалсификуваните банкноти во евра.

„Врз основа на овие информации, НБРСМ ќе може полесно да ги класифицира регистрираните фалсификати на територијата на нашата земја. А, истовремено, предвидено е да испраќа и редовни месечни извештаи до ЕЦБ, со кои ќе известува за сите регистрирани фалсификувани евра откриени во нашата земја. Со тоа се создава простор нашата Централна банка да ја потврди, не само својата определба, туку и својата подготвеност да биде конструктивен член на европското централно-банкарско семејство“, соопштија од НБРСМ.

Инаку, лани НБРСМ склучи и договор со ЕК за соработка во сферата на заштитата на кованите евра од фалсификување, а со новиот договор, се заокружува рамката на соработката во однос на заштитата на еврото.

„Истовремено, НБРСМ засилено работи и на унапредување и усогласување на правната рамка и методологијата на системот за борба против фалсификувањето на еврото“, сооопштија од Банката.