Деветнаесетгодишно момче утрово со остар предмет повредил една наставничка и неколку ученици во основното училиште „Пречко“ во Загреб. Едно дете им подлегнало на повредите, додека во болница се уште пет лица, од кои три деца, јави хрватскиот сервис на „Н1“.
Настанот се случил околу 9 часот и 50 минути, кога насилникот влегол во просториите на училиштето и со остар предмет нападнал наставничка и ученици. По нападот, 19-годишникот се обидел да се повреди самиот.
Министерката за здравство на Хрватска, Ирена Хрстиќ, изјави дека е згрозена од нападот во „Пречко“, во кој, како што наведе, загинало седумгодишно дете. Таа изрази сочувство до семејството на починатото дете, а за повредените рече дека се пренесени во болница и во овој момент се надвор од животна опасност.
Меѓу повредените во болница се наставничката, напаѓачот и три деца.
Хрватскиот министер за внатрешни работи, Давор Божиновиќ, рече дека според досега прибраните податоци, сторителот порано бил ученик во истото училиште и живеел во негова близина.
„Н1“ ја пренесува изјавата и на министерот за образование и наука на Хрватска, Радован Фучс, според кој 19-годишниот напаѓач имал медицинска историја, што значи дека не станува збор за терористички чин.
