Најтешко повредените лица од синоќешниот пожар во дискотека во Кочани ќе се транспортираат на лекување во странство. Како што информираше министерот за здравство Арбер Таравари, пациенти ќе бидат транспортирани во Бугарија, Турција, Грција и Србија, а помош била понудена и од Турција, Холандија и други држави
„Според анестезиолозите, 18 до 20 пациенти кои се покритични ќе треба да ги транспортираме надвор од државата. Тие ќе одлучат каде ќе биде најсоодветно да го продолжат лекувањето“, рече Таравари.
Петмина ќе заминат во Софија, Бугарија, ќе се транспортираат со авион на бугарското воено воздухопловство, а по тројца ќе бидат пренесени во Србија и Грција.
Директорот на Центарот за управување со кризи, Стојанче Ангелов денеска информира дека направени се подготовки за транспорт на тешко повредените лица во болници во европските држави.
