Поројни дождови предизвикаа поплави по должината на реката Гвадалупе во Тексас, во кои загинаа најмалку 24 лица, додека спасувачките екипи се обидуваат да спасат десетици жртви заробени од надојдената вода или пријавени како исчезнати во катастрофата, соопштија локалните власти.
Меѓу исчезнатите има и 23 до 25 девојчиња кои посетувале летен христијански камп, сместен на бреговите на Гвадалупе. Гувернерот на Тексас, Грег Абот, изјави дека операциите за пребарување и спасување ќе продолжат и денеска.
Националната метеоролошка служба на САД прогласи вонредна состојба поради ненадејни поплави во делови од округот Кер во јужно-централниот дел на Тексас Хил Кантри, откако наврнаа огромни количини дожд.
Далтон Рајс, градски менаџер за Кервил, седиштето на округот, изјави дека екстремните поплави се случиле пред зори без никакво предупредување, спречувајќи ги властите да издадат наредби за евакуација однапред, бидејќи Гвадалупе брзо се искачи над највисокото ниво на поплавување.
„Ова се случи многу брзо, во многу краток временски период за помалку од два часа што не можеше да се предвиди, дури ни со радар“, рече Рајс.
Службениците за управување со вонредни состојби на државата предупредија уште во четврток дека западен и централен Тексас се соочуваат со обилни дождови и закани од ненадејни поплави во текот на следните неколку дена, цитирајќи ги прогнозите на Националната метеоролошка служба пред празничниот викенд.
„Овие временски прогнози не ја предвидоа количината на дожд што наврна“, изјави на прес-конференција во петокот вечерта В. Ним Кид, директор на Одделот за управување со вонредни состојби во Тексас.
