На програмата на „Охридско лето“, вечерва во Предворјето на црквата „Св. Софија“, ќе се игра драмската претстава „Нашиот клас“, во изведба на Театар „Камери“ и на Национален театар „Хабима“ од Тел Авив.
Љубителите на театарската уметност ќе бидат во можност да ја проследат претставата која е наградена за најдобра изведба на годината, за оваа година, во Израел.
Претставата „Нашиот клас“ од Тадеуш Слобоѓањек е во режија на Ханан Снире, како копродукциски проект на двата театри од Израел. Снире дипломирал театарска уметност на Универзитетот во Тел Авив и на Кралската академија за драмски уметности во Лондон, каде што, исто така, предавал и режирал. Од 1990 до 1991 година работел како уметнички директор во театарот „Хабима“.
Претставата ја обработува темата за комплицираните врски помеѓу Полјаците и Евреите во текот на Втората светска војна. Драмата е локална и универзална, приказна која, всушност, се случува во селото Једвабне во Источна Полска на 10 јули 1941 година, кога полските католички соседи упаднале во домовите на Евреите со кои пораснале, ги заробиле во локалната штала и запалиле 1.600 Евреи.
