Уривањето на големата брана во Херсон на југот на Украина ќе има катастрофален ефект врз лоцирањето на нагазни мини, предупреди Меѓународниот комитет на Црвениот крст, пренесе Би-би-си.
Ерик Толефсен, шеф на Единицата за контаминација со оружје на Црвениот крст, предупреди дека мините расфрлани во поплавата предизвикале голема загриженост не само за жителите на Херсон, туку и за оние кои доаѓаат да помогнат.
„Знаевме каде се опасностите, сега не знаеме. Само знаеме дека се некаде низводно“, изјави тој.
Наталија Хуменјук, портпаролка на јужната воена команда на Украина, изјави за украинската телевизија дека „многу противпешадиски мини, во областите заземени од Русите, сега станале пловечки мини“.
„Тие се многу опасни“, рече таа, објаснувајќи дека најверојатно ќе експлодираат доколку се судрат со нешто.
„Конфликтните страни не го соопштија бројот на мини што ги поставија. Знаеме само дека бројката е огромна“, предупреди Толефсен.
Претседателот Володимир Зеленски ја обвини меѓународната заедница дека не реагира доволно брзо. Тој, во своето ноќно обраќање, рече дека на Украина ѝ треба јасен и брз одговор.
Зеленски истакна дека без спасувањето на цивилите и обезбедувањето на вода за пиење, храна или лекови, невозможно е да се знае колку луѓе ќе загинат и ги обвини меѓународните организации како Црвениот крст дека ја губат способноста да спасуваат животи.
Светската банка понуди да спроведе брза проценка на штетите и најитните потреби на Украина. Организацијата веќе пресмета дека повеќе од 400 милијарди долари ќе чини обновата на уништената економија на Украина.
Пробивањето на браната, губењето на најголемиот резервоар во земјата и влијанието врз земјоделството на голема површина од витално обработливо земјиште значително ќе влијаат на зголемување на финансиските штети предизвикани врз Украина.
