Странските компании бараат квалификувани физички работници кои ги нема на пазарот на труд во Македонија и тоа е сериозен проблем во нивното работење, истакна претседателот на Советот на странски инвеститори при Стопанската комора на Македонија, Штефан Питер.
Истражувањето на кое одговориле 40 компании, покажува дека лани тие имале потреба од 500 квалификувани физички работници и половина од нив имале проблем да ги најдат.
Имајќи предвид дека квалификуваните физички работници пополнуваат до 90 проценти од работните позиции клучни за функционирањето на овие компании, Питер истакна дека во следните три години, тие ќе имаат потреба од 4.000 до 6.000 вакви работници.
„Недоволно квалификаната работна сила станува сè поголем проблем и ситуацијата е алармантна. Веќе е предоцна да се реагира. Постои итна потреба за ефикасни мерки, во спротивно компаниите ќе имаат проблеми со оперативните и секојдневните работи. Повеќе од 60 проценти од компаниите не се задоволни од физичката работна сила на пазарот на трудот и вработуваат помалку квалификувани кадри. За реформите е потребно време, а бизнисот тоа време го мери во часови“, изјави Питер.
Според него, еден од најголемите проблеми е да се привлечат тинејџерите и да се промени свеста во државата дека ако си менаџер, другите ќе работат за тебе, што воопшто не е точно во практика.
Тој предложи во средното стручно образование еден ден во неделата наставата да се изведува практично и секоја образовна година тој број на часови да се зголемува.
