Денеска на Криволак, како дел од еднонеделната мултинационална вежба за обука „Брз одговор 23“, војските на САД, Северна Македонија, Албанија, Црна Гора и Косово ја покажаа интероперабилноста од значење за одржување на подготвеноста на НАТО сојузниците и државите-партнери, информираше амбасадата на САД во Северна Македонија.
На настанот беа присутни собранискиот спикер Џафери, министерката за одбрана Славјанка Петровска, амбасадорката на САД Анџела Агелер, премиерот Димитар Ковачевски и други владини и воени претставници.
„Со оваа вежба испраќаме неколку силни пораки – дека придобивките од сојузништвото во НАТО се пред сè за граѓаните, дека нашата земја е подеднакво голема и важна колку секој од сојузниците и дека солидарноста е клучот на успехот и напредокот, особено во тешки времиња“, рече министерката Петровска денеска на „Криволак“ во своето обраќање на Денот за високи гости кој е дел од вежбата „Брз одговор 23“.
Министерката Петровска истакна дека силата е во различностите и дека секој успех е заеднички, и на сојузниците и на граѓаните, и додаде дека секоја инвестиција во Армијата е инвестиција во безбедноста.
На Денот за високи гости, припадниците на вооружените сили на Северна Македонија, САД, Албанија, Црна Гора и Косово изведоа вежба насловена како „Мултинационална чета во напад, подржана со артилериска, воздушна и противоклопна поддршка“.
Во рамки на вежбовната активност, употребено беше роботизираното софистицирано возило т.н. “Project Origin”, кое е во пробна употреба на Армијата на САД и кое за прв пат во вежбовни услови тестираше испалување на противоклопна ракета од типот „Javelin“.