Остатоци од летало за кои се верува дека се од авионот на „Иџипт ер“, кој се урна во мај годинава во Средоземно Море, биле најдени долж брегот на Израел, соопштила денеска канцеларијата на израелскиот премиер Бенјамин Нетанјаху, јавуваат светските медиуми.
Деловите биле најдени вчераутро, северно од Тел Авив, на брегот на приморскиот град Натанија, било наведено во соопштението, во кое се додава дека постои голема веројатност тие да се од урнатиот египетски авион.
Од канцеларијата на Нетанјаху најавиле дека пронајдените парчиња ќе бидат пратени во Египет за понатамошна анализа.
Авионот на „Иџипт ер“, кој летал од Париз за Каиро, се урна на 19 мај во источниот дел на Средоземно Море, а во несреќата загинаа сите 66 патници и членови на екипажот.
