Претседателот на Собранието, Tалат Џафери го потпиша Решението за свикување на Првата – Конститутивна седница, која ќе се одржи на 4 август, со почеток во 12 часот во Големата сала на Собранието, односно во салата позната во јавноста како Голема купола, информираат од Собранието.

„Со оглед на новонастанатата состојба со пандемијата Ковид-19 и во согласност со препораките од Комисијата за заразни болести, Конститутивната седница ќе се одвива според протоколи и критериуми коишто се утврдени во претходна координација со претседателот на Комисијата за заразни болести д-р Жарко Караџовски, со единствена цел да се намали ризикот од евентуално ширење на заразата од корона вирусот“ стои во соопштението од Собранието.

Оттаму појаснуваат дека на гостите и на претставниците на медиумите при влезот во зградата на Собранието ќе им биде мерена телесна температура, по што ќе им биде овозможено да влезат во зградата со заштитна опрема.

Гласањето на седницата ќе се одвива рачно (со картончиња), а од седницата ќе има директен пренос на Собранискиот канал на Националниот радидифузен сервис МРТ.