Во Младинскиот културен центар на 26 февруари (сабота), со почеток од 19 часот, ќе се одржи промоцијата на книгата „Вечна трага“ која под своите корици впива количина современа и доза љубовна позеија од српската поетеса Мила Михајловиќ.
Пишувана е во модерен поетски манир карактеризиран од експресивна слобода во баланс со сентименталните лирски гравури, настанати како последица на уметничката идеализација на чувствата што ја инспирираат оваа книга. Таа е синоним за литерарно отелотворување креирано поради невозвратена љубов. Поезијата прави неприкосновена и крајно револуционерна дескрипција на своите емоции на еден иновативен начин, но и покрај тоа се придржува на ренесансни книжевни начела, со што создава вонвременски спој на различни хронолошки наративи.
Мила Михајловиќ е млада српска поетеса од Косово. За збирката, „Вечна трага“ таа е добитник на наградата „Пегаз“ за 2020 година, што ја доделува Књижевна омладина Србије.