На 25 ноември, Саем за вработување ќе се одржи во Струмица, информираше владиниот портпарол Александар Ѓорѓиев. Саемот ќе се одржи во Домот на културата во Струмица и ќе трае од 11 до 14 часот.
Саемот е составен од три компоненти: Ќе се одржи организиран настан со голем број компании кои пред барателите на работно место ќе ги презентираат профилите на работници што ги нудат, а барателите на работа со нив ќе можат да разменат информации, биографии и да ја продолжат комуникацијата. Вториот сегмент е организиран форум со работодавците од Струмица и од Струмичко, а третиот сегмент е мотивациски обуки за процесот на барање работа.
На обуките ќе присуствуваат и лица кои досега биле вработени преку оперативните мерки на Владата.
За саемот во Струмица досега се пријавени 50 компании од различни дејности, а заинтересираните сè уште имаат време да се пријават во АВРМ и на нејзината интернет-страница.
По Струмица, Саем за вработување е планирано да се одржи и во Битола.
