Зоран Ѓајиќ, кој работел како надзорник на реконструкцијата на зградата на Железничката станица во Нови Сад до март 2023 година, изјави дека градежната дозвола за тој проект исчезнала од Централната евиденција (CEOP) на порталот на Агенцијата за Економски регистри (АПР), објави Н1.
Медиумот, со дополнителна проверка утврдува дека нема посебна градежна дозвола за реконструкција на станицата во Нови Сад, туку дека овие детали се вклучени во реконструкцијата на пругата од Белград до Суботица.
„Ако се обидете да најдете градежна дозвола за железничката станица во Нови Сад, таа вечерва не може да се најде“, рече Ѓајиќ.
Тој нагласи дека градежната дозвола е јавен документ и дека до неа треба да имаат пристап сите граѓани.
„Како граѓани на Србија мора да имате пристап до тој документ кој ги содржи сите елементи на издадените локациски услови, градежни дозволи, употребни дозволи со целата пропратна документација за сите објекти во оваа земја. Тоа е законска обврска што нашата влада ја презеде пред десет, петнаесет години. Не знам кој се сеќава, министерката Зорана Михајловиќ беше исклучително горда на тој регистар, велејќи дека тоа е напредок во транспарентноста“, потсети тој.
Иако преку „CEOP“ сите граѓани можеа да извршат увид во градежната дозвола, но не секој може да ја отстрани од регистарот.
Одлуката за градежната дозвола за брзата пруга, која ја издаде Министерството за градежништво, транспорт и инфраструктура на 26 октомври 2021 година, опфаќа детали на сите станици за железничката траса, вклучително и на станицата во Нови Сад.
