Целосно е доведена во прашање кредибилноста за вршењето на мандатот на Комисијата за заштита од дискриминација (КЗД), со нејзиното селективно и непрофесионално работење, порача Мрежата за заштита од дискриминација (МЗД).
Реакцијата се однесува на мислењето на Комисијата со кое се утврди дискриминација од страна на Основниот суд Скопје 1 и судијката Добрила Кацарска преку непочитување на правото на фер постапка на осудениот на две години затвор, Никола Груевски, во предметот „Тенк“. МЗД реагира и на брзањето на КЗД да донесе такво решение, при што биле игнорирани некои постари претставки.
„Комисијата не само што утврди дискриминација без да ја образложи дискриминаторската основа (личен и семеeн статус) и ја закажа седницата надвор од воспоставената пракса , туку на претставката на поранешниот премиер ѝ даде предност пред другите претставки, за кои законскиот рок од три месеци е одамна истечен. Утврдувањето на дискриминација во случајот на поранешниот премиер е само уште еден показател за непрофесионалноста и пристрасноста на Комисијата, чии членови очигледно ја злоупотребуваат својата функција за да утврдуваат дискриминација кон своите политички истомисленици дури и во случаи каде очигледно нема дискриминација“, се вели во реакцијата.
Од Мрежата за заштита од дискриминација појаснуваат дека само во последните три години нејзините членки доставиле 19 претставки во случаи на дискриминација кон маргинализирани групи граѓани, за кои Комисијата во просек доцни по речиси четири месеци, а за три од поведените претставки Комисијата доцни и повеќе од една година.
„На пример, Комисијата сè уште нема одлучено по претставката против Миленко Неделковски, пратена на 2.2.2017 година. Наспроти ваквиот однос на игнорирање на маргинализираните заедници, Комисијата постапи брзо и пред законскиот рок во предметот на поранешниот премиер, Никола Груевски“, велат од МЗД, апелирајќи Собранието итно да усвои нов закон за Закон за спречување и заштита од дискриминација, врз чија основа ќе се разреши сегашниот состав на Комисијата.
