Во денешниот судир меѓу мигрантите и припадниците на безбедносните сили на границата со Грција, повредени биле 18 полициски службеници, од кои двајца имале потешки повреди на главата, а биле демолирани и неколку полициски и армиски возила, соопшти попладнево Министерството за внатрешни работи.

Инцидентот се случил околу 13.30 часот на граничната линија кај кота 59, каде припадниците на Армијата на Република Македонија утрово почнаа со поставување на жичана ограда.

Состојбата, како што информираат од МВР, во моментов е нормализирана.

„Денес околу 13.30 часот на граничната линија кај кота 59, нарушен е јавниот ред и мир од страна на мигрантите кои се наоѓале на грчка страна на граничната линија меѓу Грција и Македонија. Мигрантите почнале да фрлаат со камења кон полициските службеници со цел пробивање на полицискиот кордон и влез на македоснка страна. Повредени се 18 полициски службеници, од кои двајца со потешки телесни повреди во пределот на главата и еден од нив со потрес на мозок. Сите се хоспитализирани во медицинскиот центар во Гевгелија. Демолирани се и неколку полициски и армиски возила и штитови“, стои во соопштението на МВР.