Прегласувањето на избирачкото место 2.011 во Теарце помина во мирна атмосфера, со различна динамика во одзивот на гласачите, кој опадна во последните часови пред завршувањето на гласањето, се вели во прелиминарната изјава на граѓанската асоцијација „Мост“, која со двајца набљудувачи и со два мобилни тима го следела прегласувањето.
„Мост“, како што стои во изјавата, ја следела и ситуацијата во периодот од поништувањето на резултатите од гласањето на 11 декември до прегласувањето, која е оценета како мирна и без инциднети, но со регистриран обид за поткуп, односно поднесена е кривична пријава против две лица, кои на гласачите во Теарце им нуделе поткуп за да не излезат да гласаат.
„Во текот на денот (вчера, во текот на прегалсувањето, н.з.) беше забележано зголемено присуство на полицијата околу гласачкото место. Околу 9 часот беше забележано дека УВ-ламбите не работат, па гласањето беше прекинато во период од 15 минути за да се набават нови, по што истото продолжи. Во понатамошната постапка на гласање и сумирање на резултатите на самото избирачко место не беа забележани нерегуларности“, стои во прелиминарната изјава на „Мост“.
Според граѓанската асоцијација, општинската изборна комисија од Теарце имала проблем при составувањето на записникот број 21 за сумирање и за утврдување на резултатите од гласањето на лицата кои своето избирачко право го оствариле во казнено-поправните установи. Ваков проблем бил констатиран и на изборниот ден на 11 декември во повеќе општински комисии.
