Дуња Мијатовиќ, претставничка на ОБСЕ за слободата на медиумите, денеска изрази загриженост за одлуката на Комисијата за верификација на фактите да ја прогласи Јадранка Костова, уредничка на неделникот „Фокус“, за соработник на тајните служби.
Мијатовиќ му напишала писмо на Томе Аџиев, претседател на Комисијата за верификација на факти, во кое вели дека не треба лустрацијата да се користи како алатка со која ќе се врши притисок на критичките гласови.
„Земајќи предвид дека „Фокус“ веќе е под притисок, вклучувајќи бројни тужби за клевета и за навреда кои му нанесуваат голема штета на списанието и на неговите новинари, на одлуката на Комисијата може да се гледа како на вршење притисок, загрозување на медиумот што може да има застрашувачки ефект врз слободата на медиумите во земјата“, напишала Мијатовиќ.
Мијатовиќ ќе продолжи да ја набљудува одблиску ситуацијата и нејзиниот понатамошен развој.
