Додека цело МВР е ангажирано да го пронајде „бегалецот“ Сашо Мијалков по кого се распишаа и национална и меѓународна потерница, тој бил тука, во Македонија. Екипа на „24 Вести“ попладнево го сними пред Обвинителството за организиран криминал, каде беше тргнат за да си го земе решението за куќен притвор. Мијалков се извини на македонска јавност затоа што сите го барале, а тој не знаел, затоа што бил болен, со симптоми на ковид и висока температура и останал еден ден во изолација.
„Сакам да ѝ се извинам на целата македонска јавност поради непријатноста што се случи во државава. Се извинувам на Владата и на сите инстанци. Уште еднаш да повторам дека јас нема никогаш да побегнам. Кога ќе дадам збор, не го погазувам. Еден ден бев во изолација и гледајте што се случи“, рече Мијалков за „24 Вести“.
Полицијата го бара Мијалков од завчера, за да му го врачи решението за куќен притвор, како обвинет во случајот „Таргет-Тврдина“, а денеска министерот за внатрешни работи, Оливер Спасовски, одржа прес конференција на која изјави дека се трага интензивно по Мијалков кој е во бегство, но дека според сознанија на МВР, тој не е надвор од државава.