Премиерот Христијан Мицкоски на денешната собраниска седница за пратенички прашања изјави дека нема да направи „ни милиметар“ поместување околу уставните измени сè додека во бугарскиот Комитет за малцинства не биде вклучен и Македонец.
„Во Бугарија има Комитет во кој членуваат претставници на малцинствата Роми, Турци и Ерменци, а зарем ние Македонците кои имаме 14 пресуди во Судот за човекови права во Стразбур, не заслуживме место во тој комитет, а тие заслужија место во нашата Преамбула. Додека не видам таму Македонец кој е дел од тој комитет, а за тоа треба сите да работиме, нема ни милиметар да мрднам додека сум премиер на оваа влада“, изјави Мицкоски.
Тој повторно нагласи дека предизвикот со уставните измени односно вклучувањето на Бугарите во Преамбулата на Уставот бил резултат на прифаќањето на Францускиот предлог од страна на претходната влада. Сегашната, рече, е во позиција да создава стратегија како да се продолжи евроинтегративниот процес, без нови барања.
„Како влада кога го имате ова пред вас, седнувате и правите стратегија. Ако гледате државнички и пошироко, тогаш ќе речете што добиваат граѓаните и државата, имајќи предвид дека министерот за надворешни работи на нашиот источен сосед кажа дека ова е само почеток, а не е крај на барањата“, истакна премиерот.
Осврнувајќи се на извештајот на специјалниот известувач на ЕУ за Северна Македонија, кој на 4 јуни ќе биде предмет на расправа во Европскиот парламент, Мицкоски посочи дека се работи за историски значаен документ.
„Во овој извештај стои дека имаме посебен македонски идентитет различен од нивниот, не после 1945 туку векови претходно и македонски јазик, и ако не е тоа проблем, еве европските пратеници имаат прилика и таму се гласа со мнозинство, не едногласно и затоа барам од опозицијата кои се дел од одредени политички семејства кои имаат европратеници да лобираат во насока да се прифати“, рече Мицкоски.
Оваа изјава доаѓа само еден ден по неговата прес-конференција, на која, одговарајќи на новинарско прашање, рече дека очекува Европскиот парламент едногласно да го изгласа извештајот. Денеска, пак, ја ревидираше таа позиција, истакнувајќи дека гласањето е со мнозинство и повика на активна вклученост на опозицијата.
Мицкоски потенцираше дека извештајот не говори за територијална дефиниција на идентитетот, туку за национална припадност која го надминува концептот на државни граници, со што, според него, се потврдува дека „Македонци има насекаде во светот“.
Дополнително, премиерот информираше дека прв тест ќе биде документот за малцински права подготвен од Министерството за надворешни работи, кој треба да биде усвоен од земјите-членки. „Ќе видиме како ќе реагира нашиот источен сосед Бугарија“, додаде тој.
Мицкоски очекува Европскиот парламент едногласно да го потврди македонскиот идентитет и јазик
