Ние како Влада не само што ја поддржавме кандидатурата на Радмила Шекеринска, туку и активно разговаравме со нашите сојузници. За нас националното единство и интересите се пред партиските интереси и да се има македонка за заменик-генерален секретар во најмоќната и најдобро организираната алијанса во историјата е навистина чест, изјави денеска премиерот Христијан Мицкоски, одговарајќи на новинарско прашање.
„Не е тајна дека во минатото сме имале многу концептуални разлики кога станува збор за справувањето со актуелните проблеми, политиките, идеолошки разлики – и тоа не треба да го криеме, бидејќи доаѓаме од различни политички семејства и опции. Но, како Влада имавме предизвик за одлуката кого и како да го поддржиме за заменик-генерален секретар на НАТО, бидејќи имаше кандидати од неколку земји. Ние немавме никаква дилема тука, бидејќи честопати повикуваме на единство и на дијалог со опозицијата, но ако тоа не го правиме на дело а повикуваме, тогаш тоа е лицемерие“, кажа Мицкоски.
Тој додаде дека вчера разговарал телефонски со Шекеринска, разговарале и дека немал дилема дека треба заедно да соработуваат и треба да направат сè што е во нивна моќ да помогнат на македонската Армија, а со тоа да помогнат и за безбедноста и сето она кое што им е потребно на македонските граѓани.
