Народниот правобранител Иџет Мемети во пресрет на предвремените парламентарни избори ги повика граѓаните да пријавуваат предизборни нерегуларности.

„Без разлика кога ќе бидат изборите, граѓаните треба да се охрабрат и да соработуваат со институцијата Народен правобранител и да ги пријават сите предизборни нерегуларности. Досега нема ниту една претставка“, рече Мемети.

Според него, најпроблематичен е избирачкиот список.

„Ако имаме веродостоен избирачки список, тогаш секој може кредибилно да го оствари своето право. Целта на оваа прес-конференција е да се потсетат раководните лица во институциите во однос на заплашувањата во јавната администрација да не помислат на такво нешто, затоа што уште поостро ќе реагирам ако дојдеме до такви констатации“, рече Мемети.

Правобранителот ја повикува Државната изборна комисија да подготви квалитетен избирачки список кој нема да остави никаков сомнеж.

„Посебно се обраќам до тие што се на раководни позиции во институциите и до други лица во јавната администрација, да не се осмелат на каков било начин да вршат заплашување и притисоци врз вработените, да се однесуваат одговорно, зашто таквото однесување, кое е недозволиво, подлежи на кривична одговорност“, рече Мемети.