Советникот за национална безбедност на САД, Херберт Мекмастер, изјави дека американскиот претседател Доналд Трамп минатата недела, за време на средбата со високите руски претставници во Белата куќа, немал непримерен разговор или комуникација што би ја загрозила националната безбедност на земјата.
– Стојам зад изјавата што ја дадов вчера. Тоа што сакам да кажам дека претпоставката во написот (објавен во „Вашингтон пост“) е лажна. Претседателот на ниту еден начин не кажал нешто непримерно, што како последица би можело да ја загрози националната безбедност – рече Мекмастер.
Американските медиуми претходно јавија дека Трамп на шефот на руската дипломатија, Сергеј Лавров, му открил многу доверливи информации и со тоа потенцијално го загрозил изворот на разузнавачките податоци за екстремистичката Исламска држава. Белата куќа ги отфрли обвиненијата кои синоќа ги објавија медиумите.
Трамп денеска потврди со Лавров разменил информации за „тероризмот и за безбедноста во авионскиот сообраќај“, но ги отфрли обвинувањата дека направил безбедносен пропуст и дека во текот на разговорот открил строго доверливи информации.
„Имам апсолутно право да споделувам информации со Русија“, напиша Трамп на „Твитер“, додавајќи дека тоа го направил за да ја поттикне Москва да направи повеќе во борбата против ИД.
