Неколку прилепчани се помеѓу приведените деветмина студенти на кои вчера им беше изречена мерка притвор, за протестите што се одржаа минатата недела во Скопје.
Уапсените девет студенти се товарат за учество во толпа и за спречување полициски службеник во работата. Студентите, меѓу кои има и студенти од Прилеп, вчера биле изнесени пред истражен судија и издадена им била мерка притвор.
Хелсиншкиот комитет упатува апел секој што ќе биде цел на приведување од полицијата, да се брани со молчење и веднаш да се обрати во Комитетот, кој ќе му овозможи бесплатна правна заштита.
На ова реагираа и од Движењето за социјална правда „Ленка“ од Прилеп, истакнувајќи дека нема законски основи за приведувањето на студентите и дека тоа е противуставно.
– Причините кои се наведени за изрекување на мерката притвор за приведените студенти се неосновани, дури и кривичните дела што им се ставаат на товар не се исполнети затоа што тие на мирен начин го изразиле своето незадоволство, користејќи го своето уставно загарантирано право на мирен протест – изјавија од Движењето за социјална правда „Ленка“ од Прилеп.
