Мнозинство од граѓаните (59,8%) сметаат дека безбедноста во земјава е многу или главно загрозена. Меѓу нив, побројни се жените. Загриженоста опаѓа со зголемувањето на степенот на образование од 67% кај оние со незавршено основно до 47,2 кај испитаниците со завршено високо образовани, покажало истражувањето на Македонскиот центар за меѓународна соработка (МЦМС), кој ја проверувал перцепцијата на граѓаните за безбедноста, како личната, така и безбедноста во државата. Податоците биле обезбедени со телефонска анкета, спроведена на национален репрезентативен примерок од 1.000 испитаници.
Прашани со кои активности може да се надмине безбедносната загрозеност, 64% од испитаниците целосно се согласиле со изјавата построги закони и поголема дисциплина помеѓу граѓаните.
„Големо мнозинство од 91,7% се согласни (потполно или делумно) дека тоа може да се направи со подигнувањето на стандардот на граѓаните што и дава економска димензија на безбедноста. Двете области во кои треба најмногу да се инвестира за да се намали безбедносната загрозеност се јакнењето на институциите (21,8%), вложувањето во луѓето кои се дел од системот на безбедност преку зголемување на плати и набавки на опрема (19,4%)“, пишува во соопштението од МЦМС.
Според резултатите, невработеноста и сиромаштијата (57,9%), појавата на локален тероризам и вооружен бунт (52,0%) и меѓуетничките тензии (51,3%) се факторите кои можат да влијаат на безбедноста. Голема е согласноста (потполна или делумна) и кај поддршка за факторите како што е нивото на демократија, задолженоста на земјата и порастот на политичката поларизација.
Корупцијата, организираниот криминал, иселувањето во странство и финансиската задолженост ги прави многу загрижени мнозинство од граѓаните на Северна Македонија. Речиси половина од граѓаните се многу загрижени заради злоупотребата на дроги, а околу една третина, заради „белата чума“, односно депопулацијата на населението.
