Македонската банкарска асоцијација (МБА) соопшти дека сите членки вклучени во проектот „Купувам домашно“, преку кој во следните недели треба да се изработат и дистрибуираат до крајните корисници над 330.000 платежни картички, се посветени на неговата реализација, преземајќи ги сите мерки соодветни за заштита на јавното здравје.
„Секоја од банките има свој протокол за издавање на картичките и според важечките политики и процедури ја организираат постапката, доставуваат СМС-пораки со информации за филијалата или експозитурата, датумот и часот за подигнување на картичката, за секој клиент одделно. Во примена се и веб-решенија и контакт-центрите на банките, со што потребата од доаѓање во филијалите и експозитурите за информирање, е сведена на минимум“, информираат од МБА.
Сепак, и покрај тоа, во претходните денови пред некои експозитури и филијали се создадоа поголеми редици, дел од клиентите доаѓаа во банките да прашаат за проектот и да добијат информации дали се меѓу граѓаните на кои им следува домашна платежна картичка иако можат претходно да се информираат од веб-страната, купувам домашно.
„Заради заштита на јавното здравје, апелираме корисниците на домашна платежна картичка да ги следат информациите што банките ги доставуваат до нив во врска со начинот и терминот на подигнување на картичката. Истовремено, апелираме до сите клиенти, посетата на филијалата и експозитурата да ја реализираат во терминот посочен од банката, преку СМС-известување, при што ќе ги почитуваат обврските за задолжително носење заштитна маска и одржување соодветна дистанца. Со тоа секој ќе придонесе и за заштита на своето и здравјето на другите“, соопштуваат од МБА.
