Членовите на Независниот синдикат на машинскиот персонал утринава одлучија да го прекинат еднонеделниот бојкот, иако раковдоството на „Македонски железници – Транспорт“ не ги исполни барањата на машиновозачите, пренесува телевизија „Телма“.
Дел од машиновозачите биле против прекин на бојкотот, но мнозинството гласало за спротивното. Главна причина за ваквиот епилог се решенијата за суспензија и за намалување на платата за 50 отсто, кои раководството почна да им ги дели во петокот.
– Тие решенија нема да важат. Тоа е договорено усно со директорот на „Влеча на возови“, Сашко Ангеловски и оние решенија кои беа веќе подигнати, беа скинати тука пред сите нас. Доколку на платната листа се види дека некој е санкциониран или казнет, едноставно ако не биде одржан договорот од страна на раководството, бојкотот ќе биде активиран за 15 минути – изјави Душко Чакаровски, претседател на НСМПМ.
Според него, независниот синдикат не се откажува од барањата за зголемување на надоместоците на машиновозачите за ноќна работа и за работа за време на празник и на викенд. Овие барања не беа опфатени во колективниот договор, кој пред два дена директорот на „МЖ-Транспорт“, Никола Костов, го потпиша со останатите синдикати во државното претпријатие.
– Разговорите ќе течат и понатаму и ќе зависат од носењето на општиот колективен договор за јавниот сектор. Откако ќе се донесе, ќе видиме што ни следува по закон и ќе продолжиме со нашите барања – вели Чакаровски.
Од Независниот синдикат најавија дека од ноќеска на полноќ ќе почнат редовно да го опслужуваат патничкиот и товарниот железнички сообраќај во земјава. И за време на бојкотот тој не беше во прекин, бидејќи возовите ги управуваа членовите на другите два синдиката на машиновозачи.
