Социјалдемократскиот сојуз на Македонија денеска посочи дека е потребно претседателот на државата, Ѓорге Иванов, веднаш да го даде мандатот за составување нова влада за да се стави крај на блокадата на демокатските процеси, која, во спротивно, ќе кулминира на 15 мај, кога им престануваат мандатите на градоначалниците и на советите на општините.
– Македонија има итна потреба од нова влада, која веднаш ќе се зафати со решавање на насобраните проблеми, што се одразуваат штетно врз животот на граѓаните. Неопходно е веднаш да се одблокираат демократските процеси во Македонија. Ѓорге Иванов веднаш да го даде мандатот за составување нова влада на Зоран Заев – изјави денеска на прес-конференција пратеникот на СДСМ, Дамјан Манчевски.
Тој нагласи дека по 15 мај ќе нема ниту функционална локална власт, што уште повеќе ќе ја усложни ситуацијата во која се наоѓа државата.
– Потребен е итен, мирен трансфер на власта за Македонија што побргу да добие функционални институции. Потребен е итен и мирен трансфер на власта за да биде продолжен мандатот на локалните власти и да бидат закажани локални избори. Апелираме до сите, конструктивно да се приклучат кон промените и да не вршат никакви попречувања на демократските процеси – рече Манчевски.
